మెగాస్టార్ చిరంజీవి కథానాయకుడిగా వశిష్ట దర్శకత్వంలో తెరకెక్కుతున్న ‘విశ్వంభర’ సినిమా శరవేగంగా షూటింగ్ జరుపుకుంటోంది. ‘బింబిసార’ వంటి భారీ హిట్ తర్వాత వశిష్ట, మెగాస్టార్ చిరంజీవి మూవీకి డైరెక్షన్ చేసే ఛాన్స్ ను కొట్టేశారు. ప్రస్తుతం ఈ సినిమా షూటింగ్ షెడ్యూల్ హైదరాబాద్లో జరుగుతుండగా.. ఇందులో మెగా స్టార్ తో ఓ సాంగ్ను ప్లాన్ చేసినట్లు తెలుస్తోంది. ఓ భారీ సెట్లో ఆరు వందల మంది డ్యాన్సర్లతో కలిసి చిరు స్టెప్పులు వెయ్యనున్నట్లు సమాచారం. శోభా మాస్టర్ కొరియోగ్రఫీలో తెరకెక్కనున్న ఈ పాట చిత్రీకరణ మరో రెండు రోజుల్లో మొదలయ్యే అవకాశం ఉన్నట్లు తెలుస్తోంది.
ఇదిలాఉంటే.. ‘విశ్వంభర’ మూవీ ఇంటర్వెల్ బ్యాగ్ డ్రాప్ లో వచ్చే యాక్షన్ సీన్ సినిమాకు హైలైట్గా ఉండనుందని తెలుస్తోంది. ఇందుకోసం ప్రత్యేకంగా 54 అడుగుల హనుమాన్ విగ్రహాన్ని ఏర్పాటు చేసిన చిత్రబృందం.. దాదాపు 25 రోజుల పాటు ఆ భారీ విగ్రహం ముందు ఈ యాక్షన్ సీక్వెన్స్ చిత్రీకరించినట్లు తెలుస్తోంది. భారీ అంచనాల మధ్య తెరకెక్కుతున్న ‘విశ్వంభర’ సినిమాలో త్రిష హీరోయిన్గా నటిస్తుండగా.. మీనాక్షి చౌదరి, అషిక రంగనాథ్, ఇషా చావ్లా, సురభి కీలక పాత్రలు పోషిస్తున్నారు.
ఈ చిత్రానికి ఆస్కార్ విజేత ఎంఎం కీరవాణి సంగీతం అందిస్తుండగా, శ్రీ శివశక్తి దత్తా, చంద్రబోస్ సాహిత్యం అందిస్తున్నారు. దాదాపు రూ.200 కోట్ల భారీ బడ్జెట్తో యూవీ క్రియేషన్స్ ఈ సినిమాను నిర్మిస్తోంది. ఇక ఈ మే 9న విడుదల చేయనున్నట్లు చిత్ర యూనిట్ ఇప్పటికే ప్రకటించిన సంగతి తెలిసిందే. మెగా స్టార్ సూపర్ హిట్ మూవీ జగదేక వీరుడు అతిలోక సుందరి సినిమా మే 9న విడుదల అయ్యి భారీ విజయాన్ని దక్కించుకున్న విషయం తెలిసిందే. ఆ సినిమా సెంటిమెంట్తో అదే తేదీన విశ్వంభర చిత్రాన్ని విడుదల చేయాలని చిత్ర బృందం భావించినట్లు సమాచారం.